БИШКЕК, 27-авг. — Sputnik. Мелдешке крейсердик сегиз яхта катышты. Экипажга ылдамдык менен үч илмектен, тагыраагы, сегиз санын элестеткен багыттан өтүү тапшырмасы коюлган.
Парус спорту боюнча федерациянын башкы катчысы Андрей Мадеко Sputnik Кыргызстан агенттигине жел кайыктар жарышынын жеңүүчүсүнө акчалай сыйлыктар ыйгарыларын айтты. Ал бирок көптөргө байге эмес жарыштын өзүнө катышуу кызык болгонун билдирди.
"Кыргызстанда парус спортунун абалы начар. Ага карабастан, машыгып, жарыштарга катышып, балдарды үйрөтүп жаткандар бар. Бул иш-чарада өспүрүмдөр көп болду. Балдарга көлдү толкун каптап турган учурда да машыгуу абдан жагат. Жарышка катышкандардын эң кичүүсү 13 жашта", — деди ал.
Жел кайык жарышында "Полярис 116" деп аталган суднонун командасы жеңишке жетти.
Уюштуруучулар мындай мелдешти жыл сайын өткөрүп туруу ниетинде. Александр Сахарцевдин элесине арналган жел кайыктар жарышы алгач ирет былтыр, 2016-жылы болгон.
