БИШКЕК, 3-cен. — Sputnik. Нидерланддык окумуштуулар адам баласы канча жашка чейин жашай ала турганын аныктап чыкты. Бул тууралуу РИА Новости Тилбурсг университетинин сайтына шилтеме берүү менен жазды.
Окумуштуулар 1986-жылдан 2016-жылдарга чейин жашап, 94 жаштан ашык өмүр сүргөн 75 миң адамды иликтөөгө алган. Анын жыйынтыгында эркектер 114 жашка чейин, аялдар 115,7 жашка чейин жашай турганы аныкталган. Мындан сырткары, илимпоздор акыркы 30 жылдан бери эң узак жашагандардын жашы жогорудай айтыдган куракка чейин болуп жатканын баса белгилешкен.
Тарыхта тастыкталган маалыматтар боюнча эң узак франциялык Жанна Кальман өмүр сүргөн. Анын ичер суусу 122 жашка чыкканда түгөнгөн. Учурда ямайкалык 117 жаштагы Вайолет Браун жер планетасындагы адамдардын эң улуусу болуп саналат.
Белгилей кетсек, буга чейин шведдик окумуштуулар өмүрдү узартууга өбөлгө боло турчу төрт факторду атаган. Алардын айтымында, ар убак кыймылда болуу, чылымдан баш тартуу, ичимдикти чеги менен колдонуу жана туура тамактануу узак өмүр сүрүүгө жардамчы экен.
