БАТКЕН, 10-cен. Sputnik. Баткен облусунун Кадамжай районунда 10-сентябрга караган түнү катталган жол кырсыгынан төрт киши каза болду. Бул тууралуу облустук милициядан Sputnik Кыргызстан агенттигине билдиришти.
Ага ылайык, жол кырсыгына микроавтобус менен жеңил автоунаа кабылган.
"Үй-бүлө мүчөлөрү бараткан Daewoo Matiz жеңилавтоунаасы менен Mercedes-Benz үлгүсүндөгү микроавтубус кагышкан. Анын кесепетинен 44, 43 жаштагы жубайлар жана алардын 15 жана 1 жаштагы балдары каза болгон. Ал эми алардын 13 жаштагы дагы бир баласы оор жаракат алып райондук ооруканага жеткирилген", — деп айтылат маалыматта.
Андан сырткары маршруткадагы жүргүнчүлөргө тиешелүү медициналык жардам көрсөтүлдү.
