БИШКЕК, 14-окт. — Sputnik. Өкмөт башчы Сапар Исаков кыргыз-казак чек арасына барып, кырдаал курч экенин айтты. Бул тууралуу өкмөттүн маалымат кызматы кабарлады.
Эске салсак, 10-октябрда, кечинде кыргыз-казак чек арасындагы үч көзөмөл өткөрүү бекетинде кезек күткөн адамдардын жана унаалардын саны өсүп, жөнөкөй элди бушайманга салган. Бир күн өткөн соң Казакстандын улуттук коопсуздук боюнча комитети өлкөнүн бардык чек араларында атайын операция жүргөндүктөн жогорудагыдай кырдаал түзүлгөнүн маалымдаган.
13-октябрда өкмөт башчы "Ак-Тилек" жана "Ак-Жол" өткөрүү пунктуларында болуп, чек арадагы абал менен таанышып, жүк ташуучу унаалардын айдоочулары менен сүйлөштү. Бүгүнкү күндө аталган бекетте кезек күткөн адамдарга ысык тамак берилип, Тез жардам жана куткаруу кызматтары иштөөдө.
Бул боюнча Исаков жумушчу жыйын өткөрүп, чек арадагы кырдаал оор бойдон калып жатканын баса белгиледи.
"Казак тараптын өткөрүү пункттарындагы режим күчөтүлгөнүнөн улам Кыргызстан, Казакстан жана үчүнчү өлкөлөрдүн жөнөкөй жарандары эле жапа чегүүдө. Биз бул маселени тезирээк чечүү үчүн бардык иш-аракеттерди көрөбүз", — деди премьер.
Ошондой эле өкмөт башчы узун кезектен улам ишкерлер да жапа чегип жатканын кошумчалап кетти.
Мындан улам ал экономика министрлигине бул тармактагы абал боюнча маалымат алыш үчүн ишкерлер менен жолугушуу өткөрүүнү тапшырды.
