БИШКЕК, 19-ноя. — Sputnik. Кара-Суунун Жаңы-Арык айыл өкмөтүндө жол кырсыгынан каза болгон жарандар эскерилип, куран түшүрүлдү. Бул тууралуу Sputnik Кыргызстан агенттигине Ош облустук Кайгуул милиция башкармалыгынын башчысы Шаирбек Шакиров билдирди.
Анын айтымында, Бишкек — Ош автожолунун 685-чакырымында унаалар эки тараптуу токтотулуп, үч мүнөттүк эскерүү жарыяланды.
"2017-жылы 10 ай ичинде Ош облусунун аймагында 685 жол кырсыгы катталган. Анын кесепетинен 126 адам каза болуп, 1196 адам ар кандай жаракат менен ооруканага түшкөн. Ушундай жол кырсыктарынын алдын алуу, айдоочуларды жол эрежелерин сактоого чакыруу максатында жана 19-ноябрь бүткүл дүйнөлүк жол транспорт кырсыгынан каза болгондорду эскерүү күнүнө карата облустук милиция жана Жаңы-Арык айыл өкмөтүнүн жетекчилиги тарабынан атайын иш-чара уюштурулду", — деди Шакиров.
Жаңы-Арык айыл өкмөтүнүн башчысы Талант Исаев билдиргендей, Бишкек — Ош трассасынын ушул аймагында жол кырсыктары көп катталып келген. Мындан улам үстүбүздөгү жылдын июнь айында айылдын аймагына 8 видео камера орнотулган. Анын жардамы менен мал уурулук кылгандар, жол кырсыгы учурунда из жашырган айдоочулар аныкталып кармалган.
