ЖАЛАЛ-АБАД, 4-дек. — Sputnik. Сузак районунун Кара-Чолок айылында жол четинде турган окуучу баланы белгисиз унаа коюп кетип, ал окуя болгон жерде каза болду. Бул тууралуу облустук милициянын маалымат кызматы билдирди.
Ага ылайык, окуя 3-декабрь күнү саат 21:30дар чамаларында Жалал-Абад — Казарман жолунун 35-чакырымында катталган.
"Кара-Чолок айылындагы №54 орто мектебинин 9-классынын беш окуучусу мончого баруу үчүн жол четинде турушкан. ВАЗ 2121 "НИВА" үлгүсүндөгү автоунаа Казарман багыты боюнча бара жатып, балдар турган тарапка белгисиз себептер менен бурулуп келип, аларды койдуруп кеткен. Айдоочу окуя болгон жерден изин жашырып качкан. Окуянын кесепетинен 14 жаштагы өспүрүм бала кырсык болгон жерде каза тапкан", — деп айтылат маалыматта.
Ал эми экинчи окуучунун оң буту сынып, Октябрь аймактык ооруканасынын хирургия бөлүмүнө жаткырылган.
Ал эми кылмышка шектүүнү кармоо иш-чаралары улантылууда.
