БИШКЕК, 27-июн — Sputnik. Mercer деп аталган аналитикалык компания чет элдик адистер жашап иштеген кымбат деген шаарлардын рейтингин айтты. Тизме компаниянын сайтына жарыяланды.
Рейтингге караганда, эң кымбат шаар — Гонконг болуп чыкты. Азиядагы бул калааны тизменин башына турак-жайдын баасы алып чыккан. Батирдин киреси 7,5 миң доллардын тегерегинде экени белгилүү болду.
Экинчи орунда Япония борбору — Токио, үчүнчү орунда финансы жана банк иштери боюнча дүйнөлүк борбор болгон Цюрих (Швейцария) турат дешти. Андан кийин Сингапур турса, ал эми бешинчи орунга Сеул (Түштүк Корея) чыкты.
Hong Kong, Tokyo and Zurich top a ranking of the world's most expensive cities for expats https://t.co/qUIF07YPfG pic.twitter.com/C2d4wjVjBL
— Bloomberg (@business) June 26, 2018
Ондуктун ичине Шанхай, Пекин, Берн жана Африка континентинин эки калаасы Луанда (Ангола) жана Нджамена (Чад) кирген.
Ал эми Бишкек чет элдиктер үчүн эң арзан болгон шаарлардын катарынан орун алды. Тизмеге кирген 209 шаардын ичинен Кыргызстандын борбору 207-орунга чыккан. Эң арзан делген шаар Тунис (208) жана Ташкент (209) деп табылды. Адистердин пикиринде, бул аймактарда турак жайдын киреси жана тамак-аш кыйла арзан.
