БИШКЕК, 25-авг. — Sputnik. Аралды сактоо фондусунун ишинде жылыш жок болгону менен аны ар тараптуу реформалай алабыз деп терең ишенем. Максатыбыз — Борбор Азиянын бардык мамлекеттеринин кызыкчылыктарын жана зарыл керектөөлөрүн бирдей эске алуу менен фонддун ишинин натыйжалуулугун жогорулатуу. Бул туурасында Жээнбеков Түркмөнстанда айткандыгын мамлекет башчынын маалымат кызматы кабарлады.
Эске салсак, Түркмөнстандын Аваза шаарында Аралды сактоо фондусун негиздеген мамлекет башчыларынын саммити өттү. Ага президент Жээнбеков ардактуу конок катары катышты.
Саммитте фондду уюштуруучу мамлекеттеринин башчылары — Казакстандын президенти Нурсултан Назарбаев, Тажикстандын президенти Эмомали Рахмон, Түркмөнстандын президенти Гурбангулы Бердымухамедов жана Өзбекстандын президенти Шавкат Мирзиёев болду.
"Кыргызстан быйыл март айында Астана шаарында кайра жанданган Борбор Азиядагы саясий диалогду жана өз ара пайдалуу кызматташууну чыңдоону колдойт. Сиздерге белгилүү болгондой, 2016-жылы Кыргызстан фондунун ишмердигине катышууну токтото туруу чечимин кабыл алган. Бул чечимге Аралды сактоо эл аралык фондусун терең реформалоо зарылчылыгы түрткү болгон", — деген Жээнбеков.
2009-жылы Борбор Азиянын мамлекет башчылары фондунун тутумун жана келишимдик-укуктук базасын өркүндөтүү тууралуу чечим кабыл алган.
Кыргыз тарап ардактуу мейман катары саммиттин жыйынтыктоочу документи — Биргелешкен коммюникени кароого жана кабыл алууга катышкан жок.
