БИШКЕК, 10-апр. — Sputnik. Үстүбүздөгү жылдын 19-апрелинде "Ош — түрк элдеринин маданий борбору" аттуу эл аралык салтанаттуу иш-чара өтө турганын аталган шаардын мэриясы билдирди.
Кечээ вице-премьер Алтынай Өмүрбекова даярдык иштерин көрдү.
Маалыматта салтанаттын негизги бөлүгү 20-апрелде өтөрүн, ага президент Сооронбай Жээнбековдун катыша турганы айтылат.
"20-апрелде майрамдык сүмөлөк, мэрдин расмий конокторду кабыл алуусу, "Түрк дүйнөсүнүн этномаданияты" фестивалы, "Элдик каада-салттар", "Этномузыка", "Этномода" иш-чаралары өтөт. ОшМУнун башкы корпусунда илимий-практикалык конференция болмокчу. "Алымбек датка" этнографиялык борборунда "Түрк элдеринин маданияты Сулайман-Тоодо" аталышындагы эл аралык маданий иш-чарасынан кийин түрк элдеринин "Сулайман-Тоо ынтымак жүрүшү" болот", — деп айтылат билдирүүдө.
Салтанатка карата мэрдин демилгеси менен борбордук стадиондо, "Алымбек датка" этнографиялык борборунда оңдоо иштери жүрүп, борбордук көчөлөрдүн түнкү жарыктандыруу системалары жаңыланды.
