БИШКЕК, 10-сен. — Sputnik. Мектепке электрондук каттоо аркылуу кирген окуучулардын маалыматтары атайын алгоритмдер менен корголгон. Бул тууралуу "Мектепке электрондук каттоо" системасын иштеп чыккан Азамат Абдыраев билдирди.
Бүгүн, 10-сентябрда, Sputnik Кыргызстан агенттигинин мультимедиалык борборунда "Мектепке электрондук кезекке туруу: баланын жеке маалыматтарын кантип коргоо керек" аттуу маалымат жыйын өттү.
Адистин айтымында, ата-энелер балдарынын жеке маалыматтары үчүн кабатыр болбой эле койсо болот.
"Маалыматтар менен абдан тажрыйбалуу компания иштеп жатат. Жөнөтүлгөн документтердин бардыгы коопсуздук сертификаты менен, алмашуу каналдары криптографиялык алгоритмдер менен корголгон", — деди Абдыраев.
Белгилей кетсек, баланы биринчи класска электрондук каттоо аркылуу киргизүүдө ата-эне же баланы камкордукка алган тарап паспортунун маалыматтарын, электрондук почтасын көрсөтүп, өзүнүн жана баласынын документтеринин көчүрмөсүн тиркейт.
Биздин Telegram-каналга жазылыңыз.
