БИШКЕК, 11-май — Sputnik. Бишкек шаарынын мэри Азиз Суракматов брифингде өзгөчө кырдаал учурунда борбор калаанын аймагында тартип бузгандарга кандай айып салынарын айтып берди.
Эске салсак, 11-майдан тарта Кыргызстандын айрым аймактарына киргизилген өзгөчө абал режими аяктап, өзгөчө кырдаал режими уланууда.
Административдик жоопкерчилик:
- Өзгөчө кырдаал режими учурунда тартип бузгандарга айып пул — 5-17 миң сом;
- Санитардык-эпидемиологиялык эрежелерди жана тазалык нормаларын сактабагандарга — 1-27 миң сом;
- Ыйгарым укуктуу органдардын талабын же чечимин аткарбагандарга — 3-13 миң сом.
Кылмыш жоопкерчилиги:
- Өзгөчө кырдаал режимин бузгандарга — 15-60 миң сом;
- Карантиндик чектөөлөрдү сактабагандар — 30-60 миң сом.
Коронавирустун кесепети
Кыргызстанда коронавируска кабылгандардын саны 1016га жетип, анын ичинен 688и айыгып чыкты. Тилекке каршы, 12 бейтап каза болуп калды.
11-майдан тарта айрым аймактардагы өзгөчө абал режими алынып, ал эми өлкө боюнча киргизилген өзгөчө кырдаалдын мөөнөтү узартылды. Бишкек, Ош шаарларында, Ат-Башы районунда жана Чаткал районунун Каныш-Кыя айыл аймагына карантин жарыяланды. Бул жергиликтүү бийликке кырдаалга жараша чектөөлөрдү киргизүүгө укук берет.
Өлкөдө учурда абал кандай болуп жатканын Sputnik Кыргызстан агенттиги жүргүзгөн тексттик трансляциядан билүүгө болот.
Кабарларды ыкчам, ыңгайлуу шартта окуу үчүн Telegram-каналыбызга баш багыңыз.
