БИШКЕК, 24-июн. — Sputnik. Милициянын кайгуул кызматынын инспекторлору Бишкектин 5-кичи районунан адам өлтүрүүгө шектелген жаранды кармады. Бул туурасында аталган кызматтан билдиришти.
Маалыматка караганда, 2-июнда таңкы саат 05:55 чамасында 102 кызматына борбор калаанын 3-кичи районунда адамдын сөөгү жатканы туурасында маалымат түшкөн.
Айтылган дарекке Бишкек шаардык Кайгуул милициянын кызматкерлери барган. Анда болжол менен 50-55 жаштагы азият түспөлүндөгү жаран киши колдуу болгондугу аныкталган.
“Көрүлгөн ыкчам издөө иш-аракеттеринин натыйжасында ошол эле күнү 5-кичи районунан 46 жаштагы К.Э. аттуу жаран кылмышка шектүү катары кармалды. Ал Октябрь райондук милициянын Тергөө бөлүмүнө өткөрүп берилген”, — деп айтылат маалыматта.
Аталган факт Кылмыш жана жоруктардын бирдиктүү реестрине катталып, Жазык кодексинин 130-беренеси ("Киши өлтүрүү") боюнча сотко чейинки өндүрүшкө алынды.
