Саба

Саба — уй, төө, эчкинин терисинен атайын ыкма менен жасалган идиш. Кол өнөрчүлөр жаңы союлган малдын терисинин ички бетин эт, майдан тазалап, теринин жүнүн устара менен кырат. Көлөкөгө үч күндөй жайып катуу кургатпай ийлеп баштаган. Андан соң керектүү формада бычып ышкын түп, табылгынын маңызы, чиенин бутактары менен бир айдай ыштап кургатат. Керектүү деңгээлге жеткенде анын жүнү бар жагы ичине каратылып бышык жип менен алгач жөрмөлөт, андан соң кайра эки-үч күн ышталып, жөрмөлгөн жерлердин үстүнө кездеме же жылкынын 50-70 тал кылы жаткырылып, кайра бекем тигилет. Кыл сабаны бышык кылат жана ага кошумча көрк берет. Бир саба жасоого үч айга чейин убакыт сарпталат.

Ал эми серкенин териси сабага ылайыкталып сыйрылып, атайылап бычылбайт, тигилбейт. Тери устара же бычак менен кырылып, баканда кургагандан кийин кол менен жумшартып бир жумадай ийлеп, бир нече жолу ышташат. Андан соң теринин алдыңкы эки колу менен мойнун жылкынын жал-куйругунан кыл кесип келип байлап, арткы эки буту жип менен керегеге байланып илинет.

Кыргыздар сабаны кара күрөң түскө келгенге чейин узак убакыт карагайдын тобурчагы, төө таманды түтөтүп ыштап, соңунда ичин каймак, сары май менен майлап, бээнин сүтүн куюп кымыз жасаган. Баса, сабаны бир жарым, эки айда бир ыштап туруу зарыл. Антпесе ал буюм өз сапатын, формасын жогото баштайт.

Сабанын таманы менен ортолугу кенен, жайык болуп, ооз жагы кууш болот. Кыргыз элинин боз үйүндө саба көбүнчө керегеге таңылып турган. Анын чоңдоруна 50 литрге чейин суюктук сыйган.

сабанын түбүнүн узуну 70-170 сантиметр;

кууш тарткан оозунун эни 15-20 см;

эки эндүү, эки энсиз жагынан кошулган жеринин жогорку бийиктиги 80-100 сантиметр.

Сабадагы бээнин сүтү арча, четин, кайың, талдан жасалган бишкек менен бышылган. Ал жыгачтын узундугу 80-90 сантиметр, диаметри 13-15 сантиметр болуп, башына эки тактай урулган. Сабадан сүт чачырабаш үчүн териден капкак же чүпүрөк жабылган. Сабага куюлган суюктуктун даамы, түсү, сапаты бузулбайт, тескерисинче, жакшырган.