БИШКЕК, 10-сен. — Sputnik. Кыргызстанда футбол боюнча өтө турган эл аралык оюндар жогорку деңгээлде өтүшү керектигин вице-премьер-министр Дамира Ниязалиева турнирлерди уюштурууга арналган жыйында билдирди.
Үстүбүздөгү жылдын 16-сентябрында өспүрүмдөр арасында Азия чемпионатынын тандоо туру өтөт. Мындан тышкары, 8-октябрда 2018-жылы өтө турган дүйнө чемпионатынын тандоо турунун алкагында Кыргызстан Тажикстандын футболчулары, 13-октябрда Бангладеш жана 18-ноябрда Иордания командалары менен беттешет.
Ниязалиева алдыда боло турган мелдештерде Кыргызстан менен Австралиянын 16-июнда өткөн оюнундагы кемчиликтер кайталанбашы керек экенин белгиледи.
"Стадиондун ичиндеги жана сыртындагы өткөрүү пункттарында коопсуздук жана тартип сакталышы керек. Буга чейинки кетирген каталарды жоюу зарыл. Дагы бир ирет кайталайм, оюндар жогорку эл аралык деңгээлде өтүшү зарыл", — деди чиновник.
Жыйындын акырында тийиштүү министрлик менен мекемелерге тапшырмалар берилди.
