БИШКЕК, 15-фев. — Sputnik. Нарында бир жарым жашар баланы сабап өлтүргөн деп шектелген аял соттун чечими менен тергөө амалдары бүткөнчө эки айга камалганын Нарын облустук ички иштер башкармалыгынын башчысы Ороз Молдосариев Sputnik Кыргызстан маалымат агенттигине билдирди.
Маалыматка ылайык, учурда тергөө амалдары жүрүп жатат. Бир аптадан соң шектелген аял СИЗОго которулат.
"Наристени сабап өлтүргөн аял күнөөсүн мойнуна алган. Эгерде эксперттерди жалдоого убакыт кетпесе, бул иш боюнча сот эки айдан кийин болот", — деди Молдосариев.
Эскерте кетсек, Нарын РИИБдин нөөмөт бөлүмүнө 2016-жылдын 12-февралында бир жарым жашар наристенин чарчап калгандыгы тууралуу арыз түшкөн. Ал жерде 38 жаштагы апасы 5-январда бир жарым жаштагы баласын 33 жаштагы жеңесине таштап, борборго иштегени кеткен. Жеңеси өз көрсөтмөсүндө ымыркай ыйлаганда аны чырпык менен сабап, жер сүздүргөн учурлар болгонун мойнуна алган.
Бул факты боюнча Нарын РИИБи тарабынан Кылмыш жаза кодексинин 97-беренеси "Адам өлтүрүү" боюнча кылмыш иши козголду.
