Казакстан терроризм менен күрөшкөн мыйзамдарды өркүндөтө баштады

БИШКЕК, 15-июн. — Sputnik. Казакстандын премьер-министри Карим Масимов терроризмге каршы күрөшүү боюнча мыйзамды өркүндөтүү тапшырмасын берди. 

5-июнда белгисиз адамдар Актөбө шаарындагы курал-жарак саткан дүкөндү тоногон. Алар андан ары жолдо кетип бараткан автобусту күч менен токтотуп, аны менен Улуттук Гвардияга барып кол салган. Ал жердеги атышууда алты аскер кызматкери окко учуп, 38 кишиден ашыгы медициналык жардам үчүн кайрылган. 

Казакстандын ИИМи кол салууну "радикалдашкан агымдардын тарапкерлери жасады" деген маалымат берген. Казакстандын бул шаарында террордук кооптуулуктун кызыл, ал эми жалпы өлкө боюнча 40 күнгө чейин сары деңгээли жарыяланган. 

Акыркы маалыматтарга караганда, 18 кылмышкер жок кылынып, тогузу кармалган. Буга чейин Казакстандын президенти Нурсултан Назарбаев Актөбөдөгү террордук иш-аракеттер салафизмдин жолун жолдочулар тарабынан болгондугун айткан. 

"Улуттук коопсуздук комитетине кызыкдар болгон мамлекеттик органдар менен бир ай ичинде терроризмге каршы күрөшүү боюнча мыйзам долбоорун жана башка дагы нормативдик актыларды өркүндөтүү боюнча президенттин буйругу берилди. Мыйзамда тероризмге, экстремизге, куралды айлантууга каршы күрөшүү, миграция жана башка маселелерди жөнгө салуу каралат",— деп билдирди Масимов Астанада өткөн өкмөттүн жыйынында. 

Ал Коргоо министри менен Улуттук коопсуздук комитетине, ИИМге жана Финансы министрине оор жүк ташуучу аскердик аба учактарын алууга сунуштарды киргизүүнү тапшырды. 

Ал эми Саламаттык сактоо жана социалдык өнүгүү министрлигине "көйгөйлүү жаштарды жумушка орноштуруу боюнча буга чейин жасалып келген иштин нугун бир ай ичинде түп-тамырынан бери карап чыгууга" тапшырма берди. 

Өкмөт башчысы аэропортторду, автобекеттерди жана темир жол бекеттерин заманбап техникалар менен жабдуу маселесин айтты.