БИШКЕК, 19-июл. — Sputnik. Нарындын Ат-Башы районунда эртең, 20-июлда эл аралык "Кыргыз шырдагы" фестивалы өткөрүлөрүн уюштуруучулар билдирди.
Маалыматка ылайык мындай иш-чара алты жылдан бери Нарын жергесинде өткөрүлүп келе жатат.
"Бул жолу фестиваль Ат-Башынын "Кошой" стадионунда өткөрүлөт. Анда чебер айымдардын колунан жаралган түркүн-түстүү шырдактар алыскы жана жакынкы аймактардан келген меймандардын назарына салынып, мыктылары тандалат", — деп айтылат маалыматта.
Иш-чара оюн-зоок программалары менен коштолуп, улуттук тамак-аштар көргөзмөгө коюлат.
Бул маданий иш-чараны Маданият, маалымат жана туризм министрлиги, Ат-Башы райондук мамлекеттик администрациясы жана "Кыргызстан кол өнөрчүлөр кеңешмеси" уюштуруп жатат.
Эскерте кетсек,эл аралык фестиваль 28-29-июнга пландаштырылган. Бирок, ал июль айына жылдырылган болчу.
