Өзгөчө статус алган 5 ЖОЖго кандай артыкчылыктар берилет? Мыйзам ЖКда каралууда
Жазылуу
Өзгөчө статус алган жогорку окуу жайлар өзүн-өзү каржылоого жана тейлөө укугуна ээ болот.
БИШКЕК, 24-май — Sputnik. Жогорку Кеңеште Кыргызстандагы беш жогорку окуу жайга өзгөчө статус берүү мыйзам долбоору биринчи окууда талкууланып жатат.
Алар төмөнкү окуу жайлар:
Жусуп Баласагын атындагы Кыргыз улуттук университети;
Исхак Раззаков атындагы Кыргыз мамлекеттик техникалык университети;
Константин Скрябин атындагы Кыргыз улуттук агрардык университети;
Иса Ахунбаев атындагы Кыргыз мамлекеттик медициналык академиясы;
Ош мамлекеттик университети.
Билим берүү жана илим министри Каныбек Иманалиев өзгөчө статус алган жогорку окуу жайлар өзүн-өзү каржылоого өтө турганын билдирди.
Мындан сырткары, төмөнкүдөй укуктарга ээ болот:
бюджеттик каражаттарды колдонуу үчүн казыналык системадан тышкары мамлекеттин үлүшү менен коммерциялык банктарда эсеп ачуу;
билим берүү, консультациялык, илимий-изилдөө, басма, өндүрүштүк-коммерциялык жана мыйзамда тыюу салынбаган башка иштерден каражат түрүндө киреше алууга жана аларды ЖОЖдун ишин жакшыртууга, материалдык-техникалык базасын өнүктүрүүгө жумшоо;
акы төлөнүүчү билим берүү кызматтарын көрсөтүү үчүн тарифтерди өз алдынча түзүү жана бекитүү;
өзгөчө статуска ээ ЖОЖдорго профессордук, окутуучулук курамынын кызмат орундарын ээлөөнүн тартибин өз алдынча аныктоо;
мамлекеттик мүлктү ижарага берүүдөн түшкөн каражат толук өлчөмдө алардын карамагында калтырылат, республикалык бюджетке чегерилбейт;
билим берүү стандарттарын өз алдынча иштеп чыгууга жана бекитүүгө укуктуу;
лицензия албастан жогорку кесиптик жана ЖОЖдон кийинки кесиптик билим берүү программалары боюнча билим берүү ишин жүзөгө ашырууга укуктуу;
каржылык иштерин бирдиктүү казыналык эсептен тышкары жүзөгө ашырат;
бюджеттик орундар сакталат;
мамлекеттик сатып алуулар (тендер) аркылуу эмес, ички эрежелерине ылайык сатып алуу, курулуш иштерин жүргүзөт.
Белгилей кетсек, былтыр июлда президент Садыр Жапаров беш ЖОЖго өзгөчө статус берип, айрымдарын бириктирүү жарлыгын чыгарган.
