БИШКЕК, 17-янв — Sputnik. "Ысык-Көл" биосфералык аймагынын жаныбарлар дүйнөсүн сарамжалдуу пайдалануу бөлүмүнүн кызматкерлери жаңы жылдан кийинки эс алуу күндөрү Ак-Суу районунун Сырт өрөөнү боюнча браконьерликти болтурбоо жана ага каршы оперативдик рейд жүргүзгөн.
Маалыматка ылайык, 7-январда жаратылыш мыйзамдарын бузуу боюнча 4 факт катталып протоколдор түзүлгөн.
Ак-Суу районунун Ак-Булуң айылынын тургуну тоо текенин 4-6 килограммдын тегерегиндеги эти, териси менен кармалып, мамлекетке келтирген чыгымы 55 000 сомду түзгөн. Ал келтирген зыянын өз ыктыяры менен толук төлөп берген.
Ушул эле күнү, Балыкчы шаарынын тургуну Ат-Жайлоо коктусунан тоо текенин 3-4 килограмм эти жана териси менен кармалган. Келтирилген 55 000 сом өлчөмүндөгү зыянды мыйзам чегинде өндүрүү аракеттери көрүлүүдө.
Аталган мекеменин кызматкерлери Тешик-Таш өрөөнүнүн коктусунан Ак-Булуң айылынын тургуну мыйзамсыз, эч кандай уруксат кагазы жок токой фондусунун жеринде өсүп турган диаметри 8 — 24 сантиметрдик Тянь-Шань карагайларын кыйып алып, мамлекетке 24 200 сом зыян келтирген. Кармалган жаран чыгымдарды толугу менен төлөп берген.
Рейд учурунда Ак-Суу районунун сырт өрөөнүнүн Оттук коктусунан белгисиз атчан браконьерди кубалап кармоо учурунда ал ТОЗ-8 мылтыгын ыргытып жиберип, ат менен качып кеткен. Ок атуучу курал алынып протокол түзүлгөн.
