БИШКЕК, 19-ноя. — Sputnik. Үч күндөн бери кыргызстандык ишкерлердин катышуусу менен Берлинде өтүп жаткан "Bazaar-Berlin" эл аралык көргөзмө-жарманке 20-ноябрда жыйынтыкталат. Бул тууралуу Тышкы иштер министрлиги билдирди.
Маалыматка ылайык, аталган көргөзмөдө жүндөн, жибектен жана башка улуттук буюмдардан жасалган продукцияларды "Chapan KG", "Artslippers", "Kyrgyz Artisans", "Nomad’s Spirit", "Ala-Too Shop", "Уулман" компаниялары тааныштырууда.
17-ноябрда КРдин элчилиги тарабынан кыргыз стенди ачылды. Ага Жогорку Кеңештин депутаты Айнуру Алтыбаева жана элчи Эринес Оторбаев катышты.
Иш-чарада Алтыбаева Кыргызстандагы кол өнөрчүлөрдүн тармагын өнүктүрүү маанилүү экендигин белгиледи.
"Германия жашоочуларынын жүндөн жасалган табигый буюмдарга кызыгуусу жылдан-жылга артып барат. Кыргызстандык компаниялардын бул жарманкеге катышуусу мындан ары улуттук кол өнөрчүлөрдүн өнүгүшүнө жана Германиянын аймагында кыргыз маданиятын жайылтууга көмөк берет", — деди депутат.
Эл өкүлү бул тармак өлкө экономикасынын перспективдүү багыттарынын бири экенин баса белгиледи.
