Абылгазиев экономиканы өнүктүрүү боюнча жасалчу негизги иштерди атады

БИШКЕК, 29-июн. — Sputnik. Аймактык өнүктүрүү концепциясынын алкагында өсүп келе жаткан 20 шаарды инфраструктурасы менен өнүктүрүү программасын ишке ашыруу пландаштырылууда. Бул тууралуу премьер-министр Мухаммедкалый Абылгазиев "Миң жылдыкты өнүктүрүү максаттарынан Туруктуу өнүктүрүү максаттарына карай: Кыргызстанда бардыгын камтыган жана туруктуу өсүштү колдоо" аттуу семинарда айтты.

Өкмөттүн маалымат кызматынын билдирүүсүнө ылайык, премьер өз сөзүндө "Биримдик. Ишеним. Жаратмандык" программасындагы негизги багыттарды, артыкчылык жана максаттарды белгиледи.

"Экономиканы өнүктүрүү алкагында негизги иштер агро өнөр жай комплекси, жеңил өнөр жайы, туризм, курулуш, транспорт-жол сектору, өнөр жай, энергетика жана кен казуу багыттары боюнча жүргүзүлөт. Буга катар  ведомстволор аралык электрондук өз ара аракеттенүү боюнча түзүлгөн "Түндүк" системасын ишке берүү, бюджеттин пайдасына электрондук төлөмдөр системасын киргизүү, жарандарды идентификациялоо жана аутентификациялоо, киберкоопсуздуктун улуттук системасын түзүү каралууда. Ошондой эле маалыматтарды иштетүүчү жана алардын байланыш каналдарын бириктирүүчү мамлекеттик борборлорду түзүү пландаштырылууда", — деди Абылгазиев.

Андан тышкары, премьер жакынкы учурда өсүп келе жаткан эки шаарды өнүктүрүү белгиленип жатканын айтты.

"Булардан сырткары Ысык-Көл облусунда туристтик кластер, Бишкек шаарында жана Чүй облусунда тигүү кластерин жана Ош, Баткен, Жалал-Абад, Нарын, Талас облустарында айыл чарба кластерлерин ишке киргизүү пландаштырылган", — деди өкмөт башчы.

Премьер-министр экологиялык көйгөйлөрдү чечүү жана анын алдын алуу, жергиликтүү кайталангыс жаратылышты жана биотүрдүүлүктү коргоо маселесине өзгөчө көңүл буруларын кошумчалады.