КРдин Башкы прокурору Аида Салянова ноябрь айынын башында Жогорку Кеңештин депутаты Урмат Аманбаевага карата Кылмыш жаза кодексинин 303-беренеси "Коррупция" боюнча иш козгогон болчу. Эл өкүлү Ош облустук Кургак учукка каршы күрөшүү борборунун башкы эсепчиси болуп турганда дарыларды сатып алууда мыйзамсыз аракеттерди жасаган деп айыпталууда.
Адвокат бейшембидеги маалымат жыйынында билдиргендей, депутатка карата кылмыш иши мыйзамсыз козголгон, бирок башкы көзөмөлдөөчү орган жактоочу тараптын далилдерине макул болбой жатат.
"Андыктан мен кылмыш ишин козгоо жөнүндөгү токтомдун негизсиз экендигине соттук тартипте арыз берем. Аманбаева – бай аял, бирок депутат болгондон кийин өзүнүн бардык бизнесин кызына өткөрүп берген. Ал Оштогу кургак учукка каршы күрөшүү борборунун башкы бухгалтери болуп турганда мамлекетке 17 миллион сом зыян келтиргендеги тууралуу бир дагы далил жок", — дейт ал.
Адвокат ошондой эле, Аманбаева ден соолугуна байланыштуу тергөө иштерине катыша албай турганын кошумчалады.
Урмат Аманбаева Жогорку Кеңештин бешинчи чакырылышына 2010-жылы "Республика" фракциясынан депутат болуп келген. Ал Жогорку Кеңештин коррупцияга каршы күрөшүү комитетинин жетекчисинин орун басары. Өлкөнүн Акыйкатчы институтунун жетекчиси Бактыбек Аманбаевдин эжеси.
