БИШКЕК, 23-май — Sputnik. Транспорт жана коммуникация министри жана Бишкек мэри иш күндөрүн жолдордун абалы жана тазалыктын сакталышын көзөмөлдөөдөн баштоосу керектигин премьер-министр Темир Сариев өкмөттүн жума күнкү жыйынында билдирди.
Ал ошондой эле, алдыдагы эки айдын ичинде оңдоого муктаж жолдор аныкталып, иштер жыйынтыкталышы кажеттигин белгилеп, керек болсо ишти 2 нөөмөттө жүргүзүү жагы каралсын деди.
"Баарыбызга белгилүү болгондой, жергиликтүү бюджеттен каржыланган жолдор өтө начар акыбалда. Бул багытта кошумча түрдө 1 млрд. сомдон ашуун каражат табылды", — деди Сариев.
Ал эми губернатор жана мэрлерге каражаттын натыйжалуу сарпталышын жана курулуш иштеринин сапаттуу жүргүзүлүшүн көзөмөлгө алуу милдети жүктөлө турганын кошумчалады.
