БИШКЕК, 28-май — Sputnik. Псковдо жол кырсыгына кабылган үч кыргызстандыктын абалы канааттандырарлык экенин аталган облустун клиникалык ооруканасынын башкы дарыгеринин орун басары Игорь Дитрих Sputnik сайтынын кабарчысына билдирди.
Санкт-Петербург — Невель кан жолунун 287-чакырымында шаршемби күнү таңкы саат 4.35 чамасында жүк ташуучу DAF автоунаасы менен Mazda MPV жеңил машинасы кагышкан. Жол кырсыгынын кесепетинен үч киши каза болуп, бир аял ооруканага баратканда каза болгон.
Дитрихтин айтымында, үч жарандын абалы орто.
"Жол кырсыгына кабылгандардын абалы жетиштүү деңгээлде дурус. Бардыгынын мээси чайкалган. Ал эми бир кыз катуу урулган", — деди ал.
Башкы дарыгердин орун басары бир аял 1,5 сааттан кийин ооруканада өлгөнүн кошумчалады.
"Анын алган жаракаты менен жашап кетиш оор болчу. Маркумдун сөөгү учурда сот-медициналык экспертизанын өлүкканасында. Кыргызстандын элчилигинин өкүлдөрү аны кирип көрүп чыгышты",— деди Дитрих.
Кыргызстандын Өзгөчө кырдаалдар министрлиги Псков облусунда жабыр тарткандардын жана каза болгондордун тизмесин жарыялады. Каза болгондор:
- Тешебаев 1983-жылы туулган — КРдин жараны, Ленинград облусунда жашачу. Жеңил унаанын айдоочусу;
- Алимбеков 1981-жылы туулган — КРдин жараны, Санкт-Петербург шаарында жашачу;
- Кубанычбек К. 1995-жылы туулган — КРдин жараны, Санкт-Петербург шаарында жашачу;
- Тешебаева 1974-жылы туулган — КРдин жараны, кайра жандандыруу бөлүмүндө каза болгон. Санкт-Петербурге шаарында жашачу.
Псков облусунун клиникалык ооруканасына жеткирилгендер:
- Расулбек К.Н. 1991-жылы туулган — КРдин жараны. Ленинград облусунда жашоочусу;
- Гайбулла У.И. 1990-жылы туулган — КРдин жараны. Ленинград облусунда жашоочусу;
- Мамытов М.А. 1975-жылы туулган. — Ленинград облусунда жашоочусу.
