БИШКЕК, 14-июль — Sputnik. Ош эл аралык аэропортунан 9-июлда Сирияга кетип жаткан бир үй-бүлө жана аларды жөнөтүп жаткандар кармалды.
УКМК маалымат кызматы аталган комитет ИИМ менен биргеликте Сирияга жөнөтүп жаткан каналды аныктап, анын курмандыгы болуп кетип жаткандарды токтоткондугун билдирди.
Маалыматта алардын улуусу 60, ал эми кичүүсү 5 жашта, кетип жаткандардын дагы экөөсү 29 жана 16 жашта болгондугун билдирилген. Өздүк булактардын айтымында, кетип жаткан үй-бүлө Араван районун жашоочулары болгон.
"Ош аэропортунан кетип жаткандар менен кошо аларды коштоп, жөнөтүп жүргөн үч жаран кошо колго түшүрүлдү", — деп билдирди УКМКнын маалымат кызматы.
Үй-бүлөнү Сирияга азгырган 54 жаштагы аял УКМКнын Ош шаарындагы СИЗОго камалды.
