Журабаева: РАЖдын өкүлдөрү талапкерликтен баш тартуу боюнча арыз жазганын моюндашты

БИШКЕК, 20-окт. — Sputnik. "Республика – Ата-Журт" партиясынан депутаттыкка талапкер болгон бир нече өкүл аларды тизмеден чыгаруу боюнча Борбордук шайлоо комиссиясынын (БШК) чечимин кайтадан кароону талап кылышууда. Бул тууралуу БШКнын мүчөсү Гүлнара Журабаева жыйында билдирди.

Буга чейин партиянын бир нече мүчөсү тизмеден чыгуу боюнча эч кандай арыз жазбаганын билдирип, аларды тизмеден мыйзамсыз чыгарып салганын айтышкан. Өткөн жума күнү алар митингге чыгып, Борбордук шайлоо комиссиясынын төрагасы менен жолугууга аракет кылышкан.

Журабаеванын маалыматы боюнча, алар шайлоо болорго чейин эле талапкерлердин тизмесинен чыгуу боюнча арыз жазганын моюнга алышкан.

"Алардын айтымында, 4-октябрда жазылган арыздар юридикалык күчкө ээ эмес. Алар бул арыздардын көчүрмөсүн берүүнү талап кылууда", — деди ал.

Журабаева ошондой эле, БШКнын 15-октябрда боло турчу жыйынына чейин эле талапкерлердин кээ бири алардын катышуусу жок тизмеден чыгарбоосун суранып кат жөнөтүшкөнүн айтты.

БШКнын дагы бир мүчөсү Жеңишбек Акматов ага бир да талапкер комиссиянын чечимин кайтадан кароо талабы менен кайрылбаганын билдирип, алар болгону баш тартуу боюнча жазган арыздарынын көчүрмөсүн гана сураганын айтты.

Рада Түмөнбаева менен Жыргалбек Саматов талапкерликтен баш тартуу боюнча арызын күн мурунтан эле жазганын тастыкташты.

Парламенттик шайлоонун жыйынтыгы боюнча алты партия жети пайыздык тосмону өткөн. "Республика – Ата-Журт" партиясы экинчи болуп өтүп, 6-чакырылыштагы Жогорку Кеңештен 28 мандат алган.