БИШКЕК, 21-окт. — Sputnik. Ысык-Ата РИИБ жана Токмок ШИИБ кызматкерлерине карата Кылмыш жаза кодексинин "Кыйноо" беренеси боюнча эки кылмыш иши козголгонун Башкы прокуратура билдирди.
Маалыматка ылайык, Ички иштер министрлигинин аталган бөлүк кызматкерлери Токмок шаарындагы жана Ысык-Атада жайгашкан Кең-Булуң айылында болгон талап-тоноочулуктун бетин ача албай, аны башка кылмышка шектелип кармалган жарандарга "илип" коюуга аракет кылышкан.
Жарандар бир нече жолу кайталаган ур-тепкиге, кыйноого чыдабай каракчылык кылмышын моюндоого аргасыз болуп, көрсөтмө беришкен.
Учурда жарандарды кыйноого алган кызматкерлерге карата козголгон эки кылмыш ишинин негизинде тергөө амалдары улантылууда.
