Кыргыз коомчулугунда Насирдин Исанов таза, кесипкөй жана салмактуу жетекчилердин катарында эскерилип келет.
Насирдин Исанов 1991-жылы январь айында Кыргызстандын премьер-министри болуп шайланган.
Жекшеев эскерүүсүндө Исанов өтө таза, коррупцияга аралашпаган инсан катары таанылып, кыска жашаса да, элине берилгендик менен кызмат кылган дейт. Аны ынандырган дагы бир учур болуптур. 1990-жылдары Оштогу коогалаңдан кийин Ош шаарына барып Кыргызстан демократиялык кыймылы конференция өткөрүп, анда кыргыз ишкерлерине, жаштарга кредит жагынан көмөк көрсөтүү боюнча көп сунуш, суроо-талаптар түшөт.
"Келгенден кийин премьер-министр Насирдин Исановго мен, Топчубек Тургуналиев, Казат Акматов болуп кирдик. Жолугуп, сүйлөштүк. Ал Оштогу ишкерлерди колдоо боюнча дароо тапшырма берип, аз убакыттан кийин ири суммадагы акча бөлүндү. Эми аттарын айтпай эле коёюн, ортодогу шылуундар каражатты дарегине жеткирбей пайдаланып кеткендер болду. Менин бул жерде Исановдун чечкиндүүлүгүн, маселени көрө билгендигин айткым келип жатат", — деди Жекшеев.
Ал Исановду кандай маселе болбосун, жөнөкөй элге жан тартып, ыктап турат эле деп эскерип, мамлекеттин кызыкчылыгын башкалардан жогору койгон сапатын айтты.
Улуу инсандын өмүрү капыстан үзүлгөндүгүн эскерген Жекшеев, ушул кезге чейин коомчулукка кырсыктын себебин изилдеген аргументтер айтылбагандыгын белгиледи.
"Насирдин Исановдун өлүмү күмөн санатып, ушул күнгө чейин табышмактуу болуп келе жатпайбы. Бул иштин баарын аягына чыгарып, ачык-айкын айтып, коомчулукка жеткирген аргументтер, так далилдер болгон жок. Кандай болгон күндө да Исанов тазалыгы, адамгерчилиги, маданияттуулугу, ишмердүүлүгү менен эсте калат", — дейт Жекшеев.
Насирдин Исанов 1991-жылы январь айында өкмөт башчылыкка шайланып, тогуз айдан кийин, 29-ноябрда 48 жашында көз жумган.
