БИШКЕК, 19-ноя. — Sputnik. Батыш лидерлеринин Владимир Путинге карата мамилеси өткөн жылкы G20 саммитинен бери таанылгыс өзгөрүлүп, андагы Россия президентин Украинага "кол салып киргени" үчүн күнөөлөп асылуулардын эми изи да жок деп жазат The Guardian.
Былтыр АКШ президенти Барак Обама Россия таптакыр элден чыгып калат десе, британиялык премьер-министр Дэвид Кэмерон орус лидерине эч ишенбестигин айткан.
"Түркияда өткөн быйылкы G20 саммитин карап көрсөк, баары таптакыр өзгөргөндөй. Путинди ар тараптан жаркын маанайда сүрөткө тартышып, аны менен Обама жана анын улуттук коопсуздук боюнча кеңешчиси Сьюзан Райс жандуу маек куруп жатышты. Путин Кэмерон жана башка лидерлер менен натыйжалуу сүйлөшүүлөрдү жүргүздү. Ар кимиси Путин менен жолуксам деп ашыгып жаткандай", — деп айтылат макалада.
"Мунун баары Путин абдан чоң дипломатиялык жүрүш жасаганын билдирет. Биринчиден, россиялык аскерлер Сирияда мыйзамдуу аракет жасап жатканын жана ал жакта олуттуу роль ойной турганын Батыштын мойнуна алдырды. Муну менен катар АКШ жетектеген коалиция менен кызматташуу жана "жакшы жигиттерге" ок атпоо жөнүндө болор-болбос убада берип койду. Бул америкалык көз караштын кескин өзгөргөнүн күбөлөйт, себеби башында АКШ Россиянын кийлигишүүсү такыр туура эмес жана "мындан эч тыянак чыкпайт" деген эле", — деп айтылат макалада.
Кэмерон да Сириянын жер ортолук деңиз жээгинде өзүнүн аскердик аба күчтөрүнүн жана аскердик деңиз күчтөрүнүн базасы жайгашкан Россиянын стратегиялык кызыкчылыктары Сирияда колдоого алынат жана корголот деп билдирген.
"Демек, Путин өзүнүн баш максаттарынын дагы бирине жеткен экен", — дейт макаланын автору.
Бирок Путин – шыктуу тактик, аны алысты көрө албаган стратег деген америкалыктардын текебер баасы жаңылыш экени азыр көрүнүүдө. Путиндин Сириядагы операциясы анын ээлеген ордун солгундатпастан, Россияны сүйлөшүүлөрдүн башкы столуна кайра кайтарды. Эми Путин — дасторконго тартылчу тамактардын бири эмес, дипломатиядагы жаңы башкы ашпозчу, деп аяктайт сөзүн макаланын автору.
