БИШКЕК, 25-ноя. — Sputnik. Бишкекте өтө турган "Кыргызстан — кыска метраждуу тасмалардын өлкөсү" эл аралык кинофестивалынын негизги сынагына Кыргызстандын атынан "Аруулук балдары" аттуу тасма катышарын "Айтыш-фильм" киностудиясы билдирди.
Маалыматка ылайык, тасма жаш режиссер Гузель Дүйшөнкуловага таандык. "Тазар" киностудиясынын колдоосу менен тартылган фильмге белгилүү режиссер Темир Бирназаров продюсерлик кылган.
Тасма майып ата менен арак ичкен эненин колунда өскөн кичинекей бир туугандар — агасы менен карындашынын жашоосун баяндайт. Анда сабактан чыккандан кийин подъезддерди тазалап күн кечирген эки өспүрүмдүн турмушу чагылдырылган.
"Кыргызстан — кыска метраждуу тасмалардын өлкөсү" эл аралык кинофестиваль Бишкек шаарында 12-декабрды башталып, үч күнгө созулат. Буга чейин фестивалдын улуттук сынагына катыша турган жергиликтүү 10 тасма белгилүү болгон.
