БИШКЕК, 15-дек. — Sputnik. Бишкекте өткөн V Эл аралык "Кыргызстан — кыска метраждуу тасмалардын өлкөсү" кинофестивалы жыйынтыкталды. Салтанаттуу иш-чара "Манас" кинотеатрында өтүп, ага Маданият министрлигинин өкүлдөрү, кино ишмерлери катышты.
Натыйжада фестивалдын эл аралык сынагында казакстандык режиссер Дархан Тулегеновдун "Луч утренней звезды", ал эми улуттук сынагында Кымбат Адылбекованын "Таксист" фильми "Мыкты тасма" номинациясынын жеңүүчүлөрү болду. Байгени калыстар тобунун төрагасы, өзбекстандык белгилүү режиссер Али Хамраев тапшырды.
Мындан тышкары, мыкты роль жаратканы үчүн казакстандык актер атайын диплом менен да сыйланды.
"Мыкты режиссура" номинациясында эл аралык сынакта россиялык режиссер Максим Дашкиндин "Не на ту лошадь" тасмасы аталса, улуттук сынакта Азат Момуновдун "Көлөкө" фильминин режиссурасы мыкты деп табылды. Байге тапшырган калыстар тобунун мүчөлөрү Елизавета Стишова менен Виктор Прокофьев аталган тасманын Эл аралык "Киношок" фестивалына катыша турганын билдиришти.
Ал эми "Көрөрмандардын тандоосуна" номинациясында улуттук сынакта Хайрулла Рахматулла уулунун "Каникулы" тасмасы жана эл аралык сынакта кыргызстандык режиссер Гузель Дүйшөнкулованын "Аруулук балдары" тасмасы татыды. Байгени белгилүү режиссер Садык Шер-Нияз тапшырды.
Кийинчерээк кошулган "Мыкты үн режиссурасы" номинациясынын улуттук сынагында жеңүүчү аталган "Таксист" фильминин үн режисееру Калыбек Шерниязовго атайын диплом тапшырылды.
Бешинчи ирет өткөн эл аралык кинофестиваль жазуучу Чыңгыз Айтматовдун элесине арналып, үч күнгө созулду. Анын алкагында эл аралык жана улуттук сынак жүрүп, жалпы жонунан 22 тасма катышты.
