БИШКЕК, 7-мар. — Sputnik. Сирия – Түркия чек арасынан өтүүгө аракет кылган сириялык качкындарга түрк чек арачылары такай кол көтөрүп, ур-соккуга алып жатканын Independent басылмасы активисттердин жана адам укуктарын коргоо уюмуна шилтеме берүү менен билдирет.
Алеппо шаарынан жакында эле көчүп келген сириялык үй-бүлө түрк чек арачылары качкындарга карата ок чыгарып, чек арадан өтүп Түркиянын аймагына кирүүгө аракет кылгандарды сабаганын айтат. Түрк өкмөтү чек арачыларга террористтер, жергиликтүү контрабандисттер такай кол салгандыктан кээде эскертүү үчүн ок чыгарарын жашырбайт деп басылма түрк аткаминерине шилтеме берүү менен маалымдайт.
Буга чейин Европа биримдиги Анкарадан Сириядан Европага келип жаткан качкындардын агымын азайтууну талап кылган. Ошол эле учурда согуш болуп жаткан аймактан качкандардын коопсуздугун сактоону да эскерткен. Түрк өкмөтү сириялык качкындарга карата алар өз иштерин ачык аткарып жатканын маалымдаган. Бирок, укук коргоочулар шашылыш медициналык жардамга муктаж болгондор гана Түркиянын аймагына өткөрүлүп жатканын билдиришүүдө.
