БИШКЕК, 31-май — Sputnik. Эгерде мени Бишкек шаардык ички иштер башкармалыгын жетектейсиң деген тапшырма коюлса баш тартпайм. Бул тууралуу Sputnik Кыргызстан агенттигине ИИМдин Ош шаардык жана облустук башкы башкармалыгынын жетекчиси Сүйүнбек Өмүрзаков билдирди.
Дүйшөмбү күнү президенттин Жарлыгына ылайык, Мелис Турганбаев министрлик кызматтан кетип, анын ордуна убактылуу Бишкек ШИИБнин жетекчиси Кашкар Жунушалиев барган.
Ушундан улам Жунушалиевдин ордуна Сүйүнбек Өмүрзаков барат деген кеп тараган.
"Бул тууралуу маалыматым жок экен. Биз, аскер адамдары жогорку жактан кандай буйрук келсе кыйшайбай туруп аткарабыз. Эгерде мени Бишкек шаардык ички иштер башкармалыгын жетектейсиң деген тапшырма коюлса баш тартпайм", — деди Өмүрзаков.
Ал 2013-жылдан бери Ош шаарынын жана Ош облусунун ички иштер башкармалыгын жетектеп келет. Милициянын генерал-майору.
