БИШКЕК, 29-июл. — Sputnik. Нөшөрлөп жааган жамгырдан улам өлкөнүн айрым аймактарында сел жүрүп эгин талааларын жууп кеткендигин ӨКМ кабарлады.
Маалыматка караганда 28-июль күнү Нарын облусуна караштуу Ак-Талаа районундагы Баетов айылында катуу жааган жаандын кесепетинен сел жүрүп, чөп жана эгин аянттарын кум аралаш суу каптап калган.
Ошол эле күнү Ош облусундагы Алай айылында саат 14.30 чамасында Беш-Кашар участкасында сел жүрүп, болжол менен үч гектар чөп, 10 сотка картошка жана 40 сотка арпа эгилген жерди жууп кеткен.
Учурда жарандык коргонуу комиссиясы тарабынан тактоо иштери жүргүзүлүп жатат.
