БИШКЕК, 4-авг. — Sputnik. Бейтааныш киши Лондондун ортосунда кишилерди бычактап, бир аял каза болуп, беш киши түрдүү жаракаттарды алганын РИА Новости шаардын полициясына шилтеме берүү менен билдирди.
"Окуя болгон жерде алты киши түрдүү жаракаттарды алды", — деп айтылат полиция тараткан билдирүүдө. Бычак жеген бир аял каза болгону айтылууда.
Окуя жергиликтүү убакыт боюнча саат 22.30дар чамасында Рассел-скверде болгон. Жараат алгандар ооруканага жеткирилди.
Кол салган жарандын 19 жашта экендиги кабарланууда. Ал убактылуу кармоочу жайдагы ооруканада.
"Алдын ала маалыматтар боюнча кармалган жаран психикалык жактан жабыркаган. Кырсыкка дал ушул фактор себеп болгону негиз катары алынууда", — деп айтылат полиция тараткан маалыматта.
Укук коргоо органдары болгон окуянын теракт болушу мүмкүндүгүн да четке каккан жок.
Окуядан кийин Лондондун көчөлөрү тыкыр көзөмөлгө алынып, нөөмөткө кошумча 600 полиция кызматкери чыкты.
