БИШКЕК, 17-авг. — Sputnik. Эсеп палатасы үч Билим берүү мекемесинин бюджеттик жана башка каражаттарды колдонуусуна аудит жүргүздү. Бул тууралуу ведомствонун маалымат кызматынан кабарлашты.
Аудиттин жүрүшүндө Бишкек техникалык колледжинде окутуулар толугу менен аткарылбаса дагы 36,8 миң сом төлөнүп берилген. Анын 22,1 миң сому бюджеттик каражат болсо, 14,7 миң сом же 289,96 жана 179,5 саат атайын каражаттан бөлүнгөн.
Жогоруда көрсөтүлгөн сумма колледждин кассасына кайтарылды.
2013-2015-жылдар аралыгында колледжде бюджеттик формада окуган 99 студент чыгарылган. Алардын окуусуна республикалык бюджеттен 2,3 миллион сом жумшалган. Ал эми контракттык негизде окуган 135 студент окуудан четтетилгендиктен 543 миң сомдук атайын каражаттар түшпөй калган.
Эсеп палатасынын отчетундагы маалыматка караганда Бишкек унаа-жол колледжинде негизсиз түрдө 346,2 миң сом каражат маяна катары төлөнүп берилген.
Университеттин 2014-2015-жылдар аралыгында 443 миң 502 саат окутуу өткөрүлүүсү керек болсо, анын 440 миң 028 сааты ишке ашкан. Мындан тышкары 2014-2015-жылдар аралыгында 47 студент окуудан четтетилген. Буга байланыштуу бюджеттик каражаттын 1,2 миллион сому текке кеткен.
Эсеп палатасы тарабынан жүргүзүлгөн аудиттин жыйынтыктарынын негизинде окуу жайларга эскертүү берилди.
