БИШКЕК, 5-сен. — Sputnik. Кырчын жайлоосунда II Дүйнөлүк көчмөндөр оюндарынын экинчи күнү "Салбурун" фестивалы менен башталды.
КРдин Салбуурун федерациясынын президенти Алмаз Акундун айтымында, фестивалга 15 өлкөдөн келген 110 спортчу катышууда.
"Баарыбыздын маанайыбыз жакшы. Буюрса фестивалыбызды баштап жатабыз. 15 өлкөдөн келген 110 спортчу күч сынашат", — деди Акун.
Казакстандын командасын баштап келген Күнтууган уулу Базарбек даярдык күч экенин айтты.
"Казакстандан 4 спортчуну алып келдик. Буюрса, даярдык мыкты. Спортчулар үчүн жакшы шарттар түзүлгөндүгүн айта кетким келет. Албетте, байгелүү орундан үмүт кылып жатабыз", — деди Күнтууган уулу Базарбек.
Фестиваль спортчулардын парады менен башталып, мергендер билек түрө жарышка түшүштү.
Экинчи дүйнөлүк көчмөндөр оюндары 8-сентябрга чейин уланат.
Sputnik Кыргызстан маалымат агенттиги жана радиосу Дүйнөлүк көчмөндөр оюндарынын расмий медиаөнөктөшү болуп саналат.
