БИШКЕК, 5-сен. — Sputnik. Премьер-министр Сооронбай Жээнбеков 3-сентябрда Өзбекстандын президенти Ислам Каримовду акыркы сапарга узатуу зыйнатына катышкандан кийин Самарканд шаарында кесиптеши Шавкат Мирзиеев менен кыргыз-өзбек чек арасындагы абалды талкуулады. Бул тууралуу өкмөттүн маалымат кызматы билдирди.
Жээнбеков президент Алмазбек Атамбаевдин атынан көңүл айтып, Өзбекстандын биринчи президенти Ислам Каримовдун эгемендүү өлкө куруудагы, эл аралык көз караштарды бекемдөөдө жана өлкөнүн социалдык-экономикалык жактан өнүгүүсүндөгү негизги ролун белгиледи.
Премьер-министрлердин жолугушуусунда соода-экономикалык өнөктөштүктүн келечеги, айыл чарба тармагындагы, транспорт инфраструктурасындагы кызматташтык маселелери талкууланды. Негизги көңүл чек ара маселесине бурулду.
Жолугушууга Жогорку Кеңеш төрагасынын орун басары Нурбек Алимбеков, ЖК депутаты Анвар Артыков, Кыргызстандын Өзбекстандагы элчиси Данияр Сыдыков катышты.
