БИШКЕК, 10-сен. — Sputnik. Армениянын таяк тартыш жана белбоо күрөшү боюнча спортчулары Дүйнөлүк көчмөндөр оюндарынын алкагындагы өткөрүлгөн дүйнөлүк чемпионатка чакырылган. Бул тууралуу Sputnik Кыргызстан агенттигине ДКО катчылыгындагы спорт коордунатору Белек Үсөнбеков билдирди.
Эске сала кетсек, буга чейин Армения спортчулары Көчмөндөр оюндарына өз алдынча кеткендиги, алар жазалана тургандыгы тууралуу маалымат тараган.
Үсөнбековдун айтымында, Армения спортчулары эл аралык федерациялар аркылуу чакырылган.
"Биз эл аралык федерациялар менен сүйлөшүп, Көчмөндөр оюндарынын алкагында дүйнө биринчилигин өткөрүүгө макулдашканбыз. Ошондуктан Көчмөндөр оюндарына көп өлкө катышты. Анткен менен федерациялар спортчулар чемпионатка кетип жаткандыгы тууралуу тиешелүү мамлекеттик органдарга маалымат берүүсү керек болчу", — деди Үсөнбеков.
Дүйнөлүк көчмөндөрдүн II оюндары 3-8-сентябрда 62 өлкөнүн спортчуларынын катышуусу менен өттү. Бардыгы болуп улуттук спорттун 26 түрү боюнча 387 медаль ойнотулган. Алар 111ден алтын жана күмүш, 165 коло медаль болду.
