"Өзгөчө" 001ААА жана 777ААА номерлери эртең сатыкка чыгат

БИШКЕК, 27-сен. — Sputnik. Мамлекеттик каттоо кызматы 001ААА жана 777ААА (01 — Бишкек шаары) мамлекеттик номерлерин шаршемби күнү сатыкка коет. 

Бул аукцион 21-сентябрда эле башталган. "121" сыяктуу кооз унаа номерлери аукциону жок сатыкка коюлат. Ал эми өзгөчө комбинациялуу номерлер Кыргызстанда биринчи жолу онлайн-аукцион аркылуу сатылып жатат.

Азырынча эң кымбат болуп 282 миң сомго сатылган 999ААА унаа эсептелет. 

3-октябрда 001 ААА, 002ААА, 003ААА жана башка унаа номерлери Кыргызстандын бардык облустарында сатылат. Булардын баштапкы баалары — 5-70 миң сом. Аукционго коюлган номерлердин тизмеси nomer.srs.kg. сайтында жайгаштырылган. Соода бир айга чейин созулмакчы.

Ар бир облусту айырмалай турган номерлер бар — Бишкек (01), Ош (02), Баткен облусу (03), Жалал-Абад облусу (04), Нарын (05), Ош облусу (06), Талас (07), Чуй (08), Ысык-Көл облусу (09). 

Аукционго катышуунун эрежелери 

Электрондук www.e.srs.kg порталында "Онлайн-аукцион" деген бөлүмдү тандагандан кийин, www.nomer.srs.kg дарегине кирүү керек. Андан кийин өздүк кабинетиңизди түзүү үчүн "Катталуу" дегенди баскандан кийин "телефон номери" деген жерге өзүңүздүн телефон номериңизди териңиз. Буларды тергенден кийин паспортуңуздун сериясын жана номерин текшеришиңиз керек болот. Андан кийин сиз буга чейин жазган телефон номериңизге сыр сөзү бар СМС билдирүү келет. Ал сыр сөз аркылуу кирип, аукционго катышуу укугуна ээ болосуз. 

Мамлекеттик каттоо кызматы ушул жылдын 1-июнунан тарта унааларга мамлекеттик номерлердин жаңы үлгүсүн сата баштаган. Азыркы үлгүдө номер үч сандан жана үч тамгадан турат. Тушунда Кыргызстандын туусунун сүрөтү мурдагыдай эле сакталган.