БИШКЕК, 3-окт. — Sputnik. Индиялык чек арачылар премьер-министр Нарендра Модиге Пакистандан кабар жеткирип учуп келген көгүчкөндү кармап алышты. Бул туурасында РИА Новости Times of India басылмасына шилтеме кылып кабарлады.
Көгүчкөн өлкөнүн түндүк тарабынан орун алган Патханкот округунун аймагынан кармалган. Полициядан анда "Урматтуу Моди, сен бизди 1971-жылдагы (индия-пакистан согушу) баягылар экен деп ойлобо. Азыр ар бир бөбөк Индияга каршы согушууга даяр турат",— деп жазылгандын айтышты.
Эки өлкөнүн мамилеси Кашмирде 29-сентябрда болгон чыр-чатактан кийин дагы чыңалып кетти. Анда Индия тарап Пакистан көзөмөлдөп турган базаларга так сокку уруп, "террорчулукка каршы операция жүргүзгөндүгүн" билдирген. Ал эми Пакистан бул чек ара тилкесиндеги адаттагы эле атышуу болгонун жана пакистандык эки жоокер каза тапкандыгын кабарлаган. Ал чыр согушкерлер Кашмирдеги аскер бөлүмүнө кол салып, 19 жоокер курман болгон окуядан бир жарым жума өткөндөн кийин катталган.
