Руслан Казакбаев: карылар үйүндөгү шарттарды жакшыртуу керек
Кыргызстандагы карылар үйлөрүнүн шартын жакшыртуу керек. Бул тууралуу "Республика — Ата-Журт" фракциясынын депутаты Руслан Казакбаев парламентте ар кандай маселелер каралып жатканда билдирди.
Анын айтымында, өлкө боюнча кары-картаңдар үйүндө көйгөйлөр көп.
"Кыргызстанда 15 социалдык камсыздоочу стационардык мекеме бар экен. Анын ичинен жетөө пенсия курагындагыларды тейлейт. Статистикага ылайык, 2 миңден 5 миңге чейинки кайырчы көчөдө жүрөт. Алардын 35 пайызы картаңдар. Өлкө боюнча кары-картаңдар үйүндө көйгөйлөр көп. Андыктан кары-картаңдар, кайырчылар, балдар үйү боюнча маселени өкмөттө караш керек", — деди Казакбаев.
Эл өкүлү картаңдар үйүндө иштегендер 5-7 миң сом аларын айтып, алардын айлыгын көтөрүү керектигин кошумчалады.
