БИШКЕК, 21-ноя.— Sputnik. Индиянын Уттар-Прадеш штатында жүргүнчүлөрдү ташыган поезд рельстен чыгып кетип, курман болгондордун саны 128ге жеткенин РИА Новости Hindu басылмасына шилтеме берип кабарлады.
Жекшемби күнү кечинде Индор-Патна жүргүнчүлөрдү ташыган поезддин 14 вагону рельстен чыгып кеткен. Буга чейин 100дөй адам каза болуп, 150гө чукул жүргүнчү оор жарадар экендиги кабарланган.
Учурда 80 маркумдун аты-жөнү аныкталып, бардыгы тең Индиянын төрт штатында жашаган жарандар болуп чыкты.
Адистештирилген мекемелер кырсык рельстердин биринен жарака кеткенден улам келип чыккан деп божомолдосо, кээ бири элдин поездге көп түшүп алышы менен байланыштырууда. Анткени 1000 адам жайгаша турчу вагонго 1700 жүргүнчү түшүп алган.
Кечээ президент Алмазбек Атамбаев Индиягы кырсыкка кабылгандардын жакындарына жана өлкө президенти менен өкмөт башчысына көңүл айтты.
