БИШКЕК, 23-дек. — Sputnik. Кыргыз опера жана балет театрында СССРдин эл артисти, композитор Абдылас Малдыбаевди эскерүү кечеси өтөрүн театрдын маалымат кызматы билдирди.
Иш-чара 27-декабрда саат 17.00дө өтүп, ал улуу композитордун 110 жылдыгына арналат.
Кыргызстандын алдыңкы опера ырчылары Сталбек Алмасбеков, Керим Орузбаев, Садырбек Жумашов, Бактыбек Ыбыкеев, Күлнур Ниязбаева, Бактыгүл Бокоева, Айзирек Момунова, Сталбек Жунушалиев, Адия Ысмайылова композитордун чыгармаларын аткарат. Кеченин дирижеру Кыргызстандын Эл артисти Жумакадыр Каниметов менен Нурматбек Полотов болот.
Эске салсак, Малдыбаев 1906-жылы 7-июнда Чүй облусунун Кемин районундагы Кара-Булак айылында туулган. Фрунзедеги педагогикалык техникумду аяктап, Москва мамлекеттик консерваториясынын улуттук студиясында эмгектенген.
Башка композиторлор менен биргеликте ал "Айчүрөк" операсын жазган. Ошондой эле "Ысык-Көлдүн жээгинде", "Манас", "Токтогул" сыяктуу көптөгөн көрүнүктүү операларды жараткан. Анын көп чыгармалары "Алтын фондго" кирген.
