БИШКЕК, 7-фев. — Sputnik. Кадамжайдын Марказ айылында 8-класстын окуучусун өлтүрдү деп 15 жаштагы бала кармалды. Бул тууралуу ИИМдин маалымат кызматы билдирди.
5-февралда саат 11.00дөр чамасында Марказ айыл аймагынын жашоочусу милицияга чалып, талаадан өспүрүм баланын сөөгү арыктан табылганын айткан. Анын денесинде зордук-зомбулуктун белгилери байкалган.
Райондук милициянын жеке курамы баланы өлтүргөн же ага тийиштиги бар кишилерди аныктоо боюнча ыкчам аракеттерди көрүп, кылмыш жаза кодексинин "адам өлтүрүү" беренеси боюнча кылмыш иши козголгон. Иликтөө учурунда бул окуяга тиешеси бар делип 15 жаштагы окуучу кармалган.
"Шектүү катары 15 жаштагы 8-класстын окуучусу кармалган. Алдын ала маалымат боюнча ал 3-февралда маркум менен айылдын четине чыгып, араздаша кетишкен. Алардын чыры мушташка чейин жетип, шектүү окуучу маркумду катуу нерсе менен чапкан. Каза болгон баланы арыкка таштап үйүнө кеткен. Эртеси келип, сөөктүн үстүн жүгөрүнүн жалбырактары менен жаап койгон", — деп айтылат маалыматта.
Учурда тергөө амалдары жүрүп жатат.
