БИШКЕК, 4-апр. — Sputnik. Санкт-Петербург шаарынын бийлиги адам өмүрүн алган жардыруудан улам үч күндүк аза күтүү жарыялады. Бул тууралуу РИА Новости маалымат агенттиги билдирди.
Терроризмге каршы күрөшүү улуттук комитетинин билдиришинче, жардыруудан акыркы маалыматтар боюнча 11 киши каза болуп, элүүгө жакын киши түрдүү жаракаттарды алган.
Белгилей кетсек, 3-апрелде Петербургдагы "Сенная площадь" жана "Технологический институт" метро станцияларынын ортосунда жардыруу болгон.
Жардырууну жасады деп Борбор Азиядан келген жарандар шектелүүдө. Анткени жарылуу болгон жерден азиат улутуна түспөлдөш кишинин денеси табылган. Ал ортодо айрым ЖМКлар бул кылмышты Казакстандын жараны жасашы мүмкүн деп маалымат таратты. Бирок Казакстандын Тышкы иштер министрлиги бул маалыматты төгүндөдү. Ошондой эле жардырууну Кыргызстандын тургуну жасады деген маалыматтар жарыяланды. Бул боюнча азырынча Кыргызстандын Тышкы иштер министрлиги түшүндүрмө бере элек. Ошол эле учурда Кыргызстандын ТИМи каза болгондордун арасында КР жарандары жок экенин маалымдады.
