БИШКЕК, 13-май — Sputnik. Лотос өскөн көлмөдө жылаңачтанып алып сүрөткө түшкөн кыз вьетнамдыктар отурган социалдык тармакта кызыл чеке талкууну жаратты. Бул туурасында Sputnik Вьетнам Dat Viet басылмасына шилтеме кылып кабарлады.
Фотосессия бир нече саатта эбегейсиз көп элди назарына түшүп, Вьетнамдын аймагына жайылып кетти.
Кыз сүрөттө алгач, лотос өскөн көлмөдө вьетнамдардын салттуу кийими менен, андан соң жылаңач денесин көрсөтүп түшкөн. Бул соцтармакта ар кыл маанайдагы пикирлерге жем таштады. Аны сындагандар да, суктангандар да болду. Анткени менен вьетнам эли үчүн лотос улуттук ыйык гүл деп саналат. Мындан улам, көбү нааразы пикирлерин жазган.
Интернетти жакшы билгендер кыздын аты-жөнүн тез эле тактап чыгып, ал тургай соцтармакка жарыялап жиберишти. Ал Вьетнамдын борбору Ханойдо жашаган Нгуен Тху Чанг (NGUYEN Thu Trang) аттуу кыз болуп чыкты.
