БИШКЕК, 15-май — Sputnik. Интернет айдыңына сакалчан, имам же дин кызматкерине окшогон киши өзүнүн кесиптештерине кол көтөрүп жана орус тилинде уят сөздөр менен сөгүнгөнү тартылган видео тарады.
Алгач ал короодо бир кишинин артынан кууп, анысы эшикти көздөй чуркайт. Чогулуп тургандардын арасынан бири "жолго чыкпа, эй" деп кыйкырган.
Бул учурда короодо 20га чукул ак допучан, динге ишенген адамдар кие турган кийимчен адамдардын бир катары аны коштоп турса, бир катарлары "болду, болду" деп беркини токтотуп жатканы тартылып калган.
Баарын "тизип жаткан" узун бойлуу адам сырткы кийимин чечип, спорттук футболкачан калып, дагы эки кишини жыга койгону видеого түшүп калган.
Бишкек шаардык милициясынан бул чатак борбор калаада болбогондугун айтышты. Ал эми Ички иштер министрлигинен бул окуянын чоо-жайы териштирилип жатканы белгилүү болду.
