БИШКЕК, 17-июн. — Sputnik. Премьер-министр Сооронбай Жээнбеков кечээ, 16-июнда эл аралык мелдештерде ийгиликке жеткен ата мекендик спортчуларды өкмөттүк сыйлыктар менен сыйлады. Бул тууралуу өкмөттүн маалымат кызматы билдирди.
Жээнбековдун айтымында, өткөн жылы ата мекендик спортчулар 528 медалга ээ болгон. Анын ичинен 127и алтын, 158и күмүш жана 243ү коло медалдар.
"Акыркы жылдары өлкө жетекчилиги тарабынан спортту өнүктүрүү, спортчуларыбызга дем берүү боюнча интенсивдүү иштерди жүргүзүп жатат. Республиканын бардык аймактарында ар түрдүү спорттук аянтчалар жана объектилер салынып, спортчулардын стипендияларынын көлөмү өсүүдө", — деп белгилеген Жээнбеков.
Премьер-министр спортту өнүктүрүүгө кошкон салымы жана спорттук эл аралык мелдештердин жыйынтыктары боюнча жогорку спорттук жакшы натыйжаларга жетишкендиги үчүн өзгөчөлөнгөн спортчуларга өкмөттүк сыйлыктарды жана акчалай байгелерди ыйгарды.
Мындан сырткары, бир канча спортчулар менен машыктыруучулар өкмөт башчынын Ардак грамотасы, энчилүү сааты жана алкыш баракчасы менен сыйланды.
Ардак грамота алган Айсулуу Тыныбекова Instagram баракчасына ыраазычылык билдирип, бийликтин колдоосу спортчулар үчүн абдан маанилүү экендигин жазган.
