БИШКЕК, 13-июл. — Sputnik. Ирак полициясы Мосул шаарынын батыш тарабынан "Ислам мамлекетинин" (ИМ) террорчуларына айлык төлөө боюнча отчеттор жазылган бухгалтердик докуметтерди таап алгандыгы тууралуу Sputnik Arabik агенттиги жазды.
Агенттик ИМ тобунун террористтеринин айлык акылары көрсөтүлгөн документти жарыялады.
Андагы маалыматтарга таянсак, согушкерлер өткөн айда үй-бүлөлүк макамына жана балдарынын санына жараша маяна алышкан.
Бойдоктор алган эң төмөнкү айлык 72 доллар же 95 миң ирак динарын түзгөн. Бирок анын 40 доллары тамак-ашына кармалып, колуна 32 гана доллардан тийген.
Мосул шаарындагы жергиликтүү адамдардын айтканына караганда, айлык акы ар кандай кырдаалдарга жараша дагы өзгөрүшү мүмкүн. Негизинен айлык өсүү тартибинде төлөнөт, бирок ушул убакка чейин эч ким 300 доллардан ашык акча ала элек.
"Жакшы айлык согуш учурунда эл аралык коалициянын соккусунан же жардыруучу заттар коюлган унаалардын чабуулу маалында майып болуп калгандарга берилери айтылат", — деди жергиликтүү булак.
Ал эми дагы бир булактын айтымында, Ниневияны бошотуу боюнча операциянын алдында Түркияга кеткен согушкерлер айлыксыз калган.
Көрсө бул адамдардын куру кол калышына Аль-Каяра (al Kayara) шаарындагы мунай чыккан жерди көзөмөлдөөдөн кол жуугандан кийин уюмда пайда болгон финансылык кризис себеп болуптур.
Жетекчилердин айлыгы
Sputnik агенттигинин өздүк булагы айтып бергендей, бул жылы эл аралык коалиция алар акча алчу банктарды бомбалап салгандыктан, айлыктар кечиктирилип калган.
2014-жылы айлыктар кандай болгон?
Өткөн жылдын сентябрь айында Sputnik агенттиги Ниневия менен Анбарды согушкерлер катуу көзөмөлдөп турган алгачкы жылдардыгы айлык акылар боюнча маалыматты жарыялаган.
Анда чет өлкөдөн келген согушкерлер 1300 доллар айлыктан тышкары, үй, унаа, аял жана ошол убакта абдан эле тартыш болгон күйүүчү май берилгени, ал эми жергиликтүү эл арасынан ИМге кошулгандар 600 доллардан алышканы айтылган.
Мындай маяна мунай чыкчу жайларга көзөмөл кылуу жана коңшу өлкөлөргө чийки мунай ташылгандыгы менен түшүндүрүлгөн.
